Herzlich willkommen auf der Website von:

STEFAN HEIMOZ - Liedermacher

Kleine Auswahl von neueren Liedertexten...
Startseite
Infos
Konzerte
Musik
Texte 1
Texte 2
Presse
Kontakt
Ds Gloenli
Chinderfrage
Joggendi Dogge
Jammertante
Ds Lied vom Troubadour
GMV
Prinzässin
Gschänkt & gratis
D Büle
Hugetobler
Dr Me
D Outo-Biografie
Chinderfrage

Isch dr Obelix stercher als du, Papa?
U wohnt im Himmel obe dr Himmelmaa?
Säg wär macht eigentlech so grossi Steine?
Het di Frou dört äne e Wolf ar Leine?
Luegt d Polizei, dass alli schnäll gnue fahre?
U säg, wo wachse eigentlech d Teigware?
Wosch du itz mit de Lego o chli schaffe?
U gfallts im Basler Zoo de Mönscheaffe?
Werum isch dr Mond plötzlech so dünn worde?
Würd är sich äch fröie über nes Zmorge?

Mys Chind, mängisch chani scho chli schmunzle
ab u zue muess i o d Stirne runzle
O we mir öppe mal en Antwort fählt
gisch du mir en Yblick i dyni Wält

Isch dr Niese dr höchscht Bärg uf dr Ärde?
Muess i i d Schuel, weni e Clown möcht wärde?
Säg gits o Mönsche, wo keni Chatze hei?
Wohnt üses Grosi eigentlech ganz ellei?
Werum blinket d Ambulanz, we si schnäll fahrt?
Werum hei di Zwärge i däm Buech ke Bart?
Hets de ganz vil Blueme im Chindergarte?
U werum muess i no so lang druf warte?
We öpper stirbt, cha är de nächär flüge?
U werum tüe di Grosse mängisch lüge?

Mys Chind, mängisch chani scho chli schmunzle
ab u zue muess i o d Stirne runzle
O we mir öppe mal en Antwort fählt
gisch du mir en Yblick i dyni Wält

Mys Chind, mängisch chani scho chli schmunzle
ab u zue muess i o d Stirne runzle
Mi dünkt das Spili ender umgekehrt
grad i ha nämlech ganz vil vo dir glehrt
Joggendi Dogge

I binge d Joggingschue, jupiii
cha wider einisch dusse sy
u chume vorwärts, wunderbar
u d Luft am Fluss isch früsch u klar
Da chunnt uf ds Mal ke Luchs, ke Bär
aber e böse Hund derhär
het myni Hose scho im Muu
wahrschinlech isch är fein, dä Guh

I jogge... mit dr Dogge
s isch nid zum sy, s isch nid so gäbig
u d Chnoche zwüschem Chifer
sy myni u no läbig

U ds Frouchen rüeft: Eh loset, dir
är wott doch spile – nid mit mir!
I weiss, das chunnt nid guet, oje
tue d Ouge zue, i chas nid gseh
Itz ischs verby, das isch soudumm
frage mi im Delirium:
Hani dä Schranz scho vorhär gha?
U schmöck i wine Cervelat...?

I jogge... mit dr Dogge
s isch nid zum sy, s isch nid so gäbig
u d Chnoche zwüschem Chifer
sy myni u no läbig

I jogge... mit dr Dogge
nei, di Dogge jogget mit mir
si git mer ds Tämpo vor
bi mega-schnäll, cha nüt derfür

Da tuen i d Ouge uf, aua
s isch ja nume e Chihuahua
im gälbe Rägemänteli
mit rosarote Bändeli

Aber glych...
isch es aggressiv, das Viech!
Jammertante

Si jammere, si jammere
si hei gäng öppis z jammere
Si jammere, si jammere
aber nid still ir Chammere
Di sogenannte... Jammertante

Über d Ehe, über ds Läbe
über ds Alter, über d Ränte
über d Chilche, über d Glogge
über d Zytig, über d Änte

Si jammere, si jammere
si hei gäng öppis z jammere
Si jammere, si jammere
aber nid still ir Chammere
Di sogenannte... Jammertante

Über ds Wätter, über d Frösche
über Frömdi, über Horde
über d Stüüre, über d Rächnig
über ds Gmües u über d Sorte

Si jammere, si jammere
si hei gäng öppis z jammere
Si jammere, si jammere
aber nid still ir Chammere
Di penetrante... Jammertante

Übere Nachbar, über d Chatz
über ds Outo, übere Chouf
über ds Fuetter, übere Nyd
über ds Läbe, übere Louf

Bim Jammere ir Chammere stört...
dass dört ds Jammere gar niemer ghört
Ds Lied vom Troubadour

Är isch gäng ungerwägs
singt wonär achunnt, syni Lieder
so geit das sit Jahr u Tag
u gar nüt wär ihm lieber

Immer wider luege d Lüt ne a
frage, werum isch dä da
was het dä hie verlore?
Aber wenär d Loutesaite zupft
spitze si de d Ohre

Nid alli hei ne gärn
wüu si gspüre was ne fählt
wüu das wo ihm wichtig isch
niene chasch choufe für Gäld

Mängisch übernachtet är im Strou
mängisch o binere Frou
wore d Lieder guet hei gfalle
lat es Stückli vo sym Troum hie
blybe möcht är nie

U immer wider luege d Lüt ne a
frage, werum isch dä da
säg, was het dä hie verlore?
Wenär syni Loutesaite zupft
spitze si de d Ohre

Dr Troubadour...
isch mal hie u isch mal dört
wüu ihm d Wält halt o chli ghört
fingt offni Ohre, mängisch es volls Täller
Teil Lüt hetze ihri Hünd uf ihn
meischtens isch är schnäller

Är isch gäng ungerwägs
singt wonär achunnt, syni Lieder
so geit das no Jahr u Tag
u gar nüt wär ihm lieber
GMV (dr Gsund MönscheVerstand)

Mängisch wird i gfragt, was i äch so tüi wähle
– ob SP oder ender SVP
Mou, i tue scho wähle, aber di beschti Partei gits no nid
– di wetti zersch mal gseh:

GMV – dr Gsund MönscheVerstand
GMV – das ligt doch uf dr Hand
GMV – u Politiker, wos nid begriffe hei
berchöme frei u dörfe hei

Ab sofort geit me jedere guete Idee uf e Grund
ganz egal, ob si vo linggs, rächts oder us dr Mitti chunnt
es geit nume um d Sach, me prüeft jedem syni Inträsse
u Spili, wos um Macht u Gäld geit, cha me grad vergässe
Me zieht am glyche Strick, kene leit em angere es Ei
d Meinigsüsserig isch frei u nümm bunde a ne Partei

GMV – dr Gsund MönscheVerstand
GMV – das ligt doch uf dr Hand
GMV – u Politiker, wos nid begryffe wei
berchöme frei u müesse hei (o we si gar nid wei)

Me handlet mit em Blick gäg obsi, wos keni Gränze git
u Politiker us allne Lager mache yfrig mit
Ab sofort u für immer chöi mir alli druf vertroue
dass si am Ändi vom Tunäu kes wyters Tunäu boue

Dr gsund Mönscheverstand:
Drum isch es wichtig, dass me däm ging Rächnig treit

Blöd isch nume, dass jede öppis angers drunger versteit
Prinzässin

We du e Prinzässin wärsch
u i dym Turm würdsch stah
u di e Drache würd hüete
de wäri sofort da
o wenär tobet u macht
i würd ne ganz sicher erschla
aber s wär mer o rächt
wenär alt u fuul wär
oder grad nid da

Wüu i bi gar ke Prinz
ha kes wysses Ross
ha nume e Huufe Fähler
statt em ne Schloss

Du bisch ke Prinzässin
u i bi nid e Held
wo sech Lindwürm u Riise
mit Muet entgägestellt
derfür blyb i bi dir
solang wi du wosch
das isch alles wo zellt

Wüu i bi gar ke Prinz
ha kes wysses Ross
ha nume e Huufe Fähler
statt em ne Schloss

I bi gar ke Prinz
ke verzouberete Frösch

We mir es Müntschi gä hesch
bini ging no dä
woni bi gsi
Gschänkt u gratis

Zytig isch gratis
Spili sy gratis
Chärtli sy gratis
Alls isch gratis
Download isch gratis
Heftli sy gratis
Zigis sy gratis
Mischt isch gratis
ds Müschterli... isch gratis

I wotts nid gratis, wotts nid gschänkt
isch gnau das, woni ha dänkt
u ganz sicher dütlech gseit
nume dass mi dä guet Ma da... nid versteit

Täfeli sy gratis
Handys sy gratis
Pünktli sy gratis
Ds 10. isch gratis
Ds Update isch gratis
Filmli sy gratis
Wärbig isch gratis
alls isch gratis
di erschte 2 Mönet... ischs ämu gratis

I wotts nid gratis, wotts nid gschänkt
isch gnau das, woni ha dänkt
u ganz sicher dütlech gseit
nume dass mi d Frou am Schalter... nid versteit

I wotts nid gratis, wotts nid gschänkt
isch gnau das, woni ha dänkt
u ganz sicher dütlech gseit
nume dass mi dä ir Leitig... nid versteit

Itz hani all di Sache gratis übercho
Altpapier u Sondermüll, e Ghüdermargge
- das hani itz dervo!
D Büle

S isch gfährlech, dr Chopf zum Fänschter use z ha
We me ne mal z wyt voruse würd ha
chönnt me ne halt o aschla

Drum isch es gfährlech, dr Chopf zum Fänschter use z ha
Wüu we me ne z wyt voruse würd ha
chönnt me ne halt scho aschla

S isch gfährlech, dr Chopf zum Fänschter use z ha
wüus vorem Fänschter so Lüt chönnt ha
wo eim eis ufe Chopf würde schla
we me ne z wyt würd use ha

Drum isch es gfährlech, dr Chopf zum Fänschter use z ha
wüus vorem Fänschter so Lüt chönnt ha
wo eim gärn eis druf würde schla
falls me ne z wyt sött use ha

Aber hätti dr Chopf nie zum Fänschter use gha
de hätti nie vil gseh u wär dinne blybe sta
wüsst nid emal, was es dusse alls hätt gha

Drum isch es gschyder, dr Chopf zum Fänschter use z ha

O weni itz e Büle ha
Hugetobler

Dr US-Presidänt isch mal uf Staatsbsuech gsi ir Schwyz
wonär e Fabrig agluegt het, seit är zum Chef, ja itz
wett är gärn dr Hugetobler gseh, dä schaff doch da
dr Chef het zimli gstuunet u sys Muu wyt offe gla

Dr Presi het dr Hugetobler fescht i d Arme gno
drufabe rüeft dr Chef dr Hugetobler i ds Büro
dr Chef het schampar Fröid gha, dass dä Büezer so bekannt
isch gsi u drückt ihm drum mit grosser Ehrfurcht d Hand

Hugetobler, het är gseit, we das so wytergeit
wirds gli emal e Lohnerhöchig gä
Wüu uf so ne bekannte Maa chöi mir nid verzichte
dir syt hie würklech grad guldrichtig

Eis mal isch d Prinzässin vo Schwede o i d Fabrig cho
si het dr Hugetobler ganz härzlech i d Arme gno
dr Chef het Fröid gha, isch stolz gsi u het gseit s sig en Ehr
dass dr Hugetobler so bekannt sig, schetz är sehr

Da het dr Hugetobler zum Chef gseit, itz loset mal
das isch nüt Bsunders, o dr Papscht kennt mi uf jede Fall
da seit dr Chef, nei guete Maa, i gloube nech kes Wort
das gö mir zwe ga überprüefe u zwar grad vor Ort

Hugetobler, het är gseit, we das so wytergeit
wirds gli emal e Ghaltserhöchig gä
Wüu uf so ne bekannte Maa chöi mir nid verzichte
dir syt hie würklech grad guldrichtig

Di zwe hei ds Flugzüüg gno i sy i Vatikan uf Rom
dr Papscht het vor de Lüt e Predig gha im schönschte Ton
wo dr Papscht dr Hugetober gseht, da stygt är abe
vor syr Kanzle für ne grad zum ne Grappa yzlade

Wo dr Hugetobler wider zu sym Chef zrügg geit
gseht är, dass dä d Wält nümm so ganz versteit
nid wüu dr Hugetobler e Bekannte isch vom Papscht
das het dr Chef nümm überrascht

Aber s het drum e Japaner wo näbem Chef isch gstange
mit em Finger zum Papscht vüre zeigt
u dä het de dr Chef gfragt: Du weisch du, wär das isch
dä wo dört näbem Hugetobler steit?
Dr Me

I kenne ne nid, ha vil vo ihm ghört
u das woni weiss, dünkt mi scho chli gstört
är tuet mer ja leid, wüsst gärn wis ihm geit
es dünkt mi zwar, är sig abverheit

I gloube är isch im Läbe nid zfride
s isch eine vo dene wo gäng chli tüe lyde
är wotts halt müglechscht allne rächt mache
verpasst derfür z vil schöni Sache

dr Me

Eigentlech würd i ihm gärn begägne
das Original vo nachem erläbe
i würd gärn mal chli mit ihm brichte
werum är uf so vil tuet verzichte

dr Me

U doch sig är es Vorbild für d Ching
machs so wi dr Me u de geits dir ring
de chunnsch problemlos dür dys Läbe
machs so wi dr Me, aber äbe

Ehrlech gseit fing i ihn nid so toll
är isch für mi würklech kes Idol
i ghöre gäng nume, was dä alls nid macht
für genau so z läbe, wis de angere passt

dr Me

Me macht nid me tuet nid me cha nid me darf nid me sött nid
me macht nid me tuet nid me cha nid me darf nid me sött nid
Das ischs, was i weiss vom Me

Me macht nid me tuet nid me cha nid me darf nid me sött nid
me macht nid me tuet nid

Drum möcht i a dere Stell no säge, gäng nume z frage, was er miech u darf u sött, dr "Me"... - das sött me nid...
D Outo-Biografie

Mys allererschte Fahrzüg isch e Chinderwage gsi
woni mit Papas Pfyffe zfride dinne ghocket bi
u d Lüt wo schampar gärn es härzigs Buebli hätte gseh
hei zwar e Chlyne gseh, aber mit Pfyffe im Mu, oje
Gly hani de mys erschte Spielzüügouto übercho
s isch zimli gly nümm gfahre, wüu is usenang ha gno

Das isch myni Outo... Biografie

Mys nächschte Fahrzüüg isch de när es Drüradvelo gsi
woni grad wine Räuber dermit umegfreset bi
u bald scho isch ar Wiehnacht ds erschte Trottinet cho
näb myne Chnöi het Nachbers Outo o chli Schade gno
Bim zwöite Velo hets de zum Glück Stützredli dran gha
ds dritte het drü Gäng gha, när het ds Brämskabel la ga

Das isch myni Outo... Biografie

Bim erschte Rennvelo hets zwar mal e platzte Pneu gä
d Fröid am sälber tschalpe hani mir trotzdäm nid la nä
ha nie es Töffli gha u ds erschte Outo zimli spät
Mobilität riemt sech halt leider o uf Radargrät
S isch es Schachteli uf Reder gsi, het zimli weni koschtet
derfür isch mer dä Charre ungerem Füdle wäg groschtet

Das isch myni Outo... Biografie

Für d Familie hani när es grössers Outo müesse ha
me wott ja schliesslech weder Frou no Chind voruss la sta
Gepäck, Spielzüüg u Windle hei no Platz mit Ach u Krach
für das hets sone Box - me seit o Sarg - mitts ufem Dach
Wi mängs Outo fahr i no, bis i dr Löffel abgibe?
Das Lied da hani, ohni Witz, imene Zug gschribe

Myni Outo... Biografie

U weni de im letschte Outo lige - hätti d Wahl -
ob schwarz, ob gross, ob chly, das isch mer de egal