D‘Pyramide

(Text & Musik: Stefan Heimoz)

Also... loset mal, di Gschicht dahie, di isch würklech (fasch) wahr

dr Chünig Cheops het z’Ägypte vor viertuusig Jahr
wo sy Lieblingstochter e Schwyzer het wölle hürate
vor luter Fröid das Hochzyt fasch gar nid chönne erwarte
Es het ne dünkt, di gröschti Pyramide, das wär dänk
es würdigs, wunderschöns u unvergänglechs Hochzytsgschänk

U d’Lüt hei gfunge:
Um di schöni Pyramide
muess me üs benyde
Dass es die hie git
- das isch dr Hit

So hei de syni Sklave halt trotz Gstöhn u chrumme Bei
di rise Pyramide hie i d’Schwyz bracht Stei für Stei
Är het sech überleit wonär se härestelle wetti
da het’s ne dünkt di passt doch wunderbar a d’Niesechetti
u drum heisst das Bouwärch, das isch ja logisch u erwise
nid Jungfrou oder Matterhorn, sondern äbe dr Niese...

U d’Lüt hei gjublet:
Um di rise Pyramide
muess me üs benyde
Dass es die hie git
- das isch dr Hit

Ja, Cheops‘ Tochter het sech im Oberland nidergla
u het mit ihrem Ma hie sehr zahlrych Nachkomme gha
So sy mir alli no chli verwandt mit de Pharaone
das erklärt, dass bi üs so schöni u gschydi Lüt wohne...
U bis hüt isch di Pyramide nid so schwirig z’gseh
di bsunderi Form, di gseht me sogar änetem See

U d’Lüt hei gjodlet:
Um di kuuli Pyramide
muess me üs benyde
Dass es die hie git
- das isch dr Hit

No hüt isch me glücklech, dass die das denn eso hei gmacht
Wüu... ohni Bärg hätti’s dr Bou vor Drahtseilbahn nid bracht
S’wär doch dumm, we d’Niesebahn dür ds Flache würdi flitze...
- chiem no derzue, dass me schampar schreg drin müessti sitze..!

 

Zurück