Bärner Gring
(Text & Musik: Stefan Heimoz)
Uf mym Hals da steit e Bärner Gring
gloub mer, das isch gar nid so schlimm
är isch zwar nid so cool u syni Form so alt wi Bärn
i ha ne trotzdäm schampar gärn
Dä Bärner Gring trag i mit Stolz
är isch halt us ganz hertem Holz
är richtet sech nid immer nach em Trend u nach dr Mode
derfür stöh myni Füess fescht uf em Bode
We's schnäll geit, mögi d'Bärner nümme mit
i ha ender ds Gfüehl, si lö sech Zyt
das isch doch öppis angers, villich merksch dr Ungerschid
uf e Gring gheit sy si nämlech nid
U chumeni gringsvora derhär
de nimi's gmüetlech wi ne Bär
i wage's fasch nid z'säge, Zürcher, syt mer itz nid bös
i wirde eifach nid so schnäll närvös
E Bärner Gring isch schampar praktisch
es Bärner Mu seit ging, was Sach isch
grediuse, dütlech, troche, ehrlech u diräkt
u das ersch no im schönschte Dialäkt
Zum Glück hani eso ne Gring
stellet nech vor, es gäb ne nümm
chiem i ohni Gring derhär, ja dir würdet nech bsägne
u mir, mir würd's i Hals yne rägne
Uf mym Hals da steit e Bärner Gring
gloub mer, das isch gar nid so schlimm
u sött är dir nid gfalle, ja de muesch doch zuegä, gäll
so eine vergisst me nid so schnäll
so eine vergisst me nid so schnäll,
gäll
