Dorfgschwätz
(Text & Musik: Stefan Heimoz)
I ga i Coop när stahni dört mit ere Frou ar Kasse
i hätt's ja sölle wüsse, dass me da chli muess ufpasse
di Frou heisst Claudia, si isch hübsch u si chunnt us St. Galle
u chunnt mängisch dahäre wüu ihre d'Bärge so gfalle
u d'Lüt luege üs a si wüsse nid dass di Blondine
nid my Fründin isch si isch nämlech myni Cousine
scho stecke si d'Chöpf zäme ds Leni, ds Vreni u dr Beni
we's öppis z'rede git, de wott o ds Lisi ging derbi sy...
Das isch nid so schlimm
das geit verby
u hingerdry merksch de gly
es hätt no schlimmer chönne sy
Wüu ds Lisi seit's em Sepp u dä Depp verzellt's em Heidi
u die dr Wirtin u em Wirt vom Chrüz itz wüsse beidi
u gly o ds ganze Dorf dass i e nöii Fründin ha
so öppis macht sech nid so guet für ne ghüratne Ma...
Das isch nid so schlimm
das geit verby
u hingerdry merksch de gly
es hätt no schlimmer chönne sy
Es isch bekannt sone Beziehig choschtet Gäld – ou ja!
u scho verzellt me dass i mi total verschuldet ha
es heisst i heig im Luxus gläbt s'göng um ne Million
itz weiss das jede u i ha gar nüt gha dervo i Clown...
Das isch nid so schlimm
das geit verby
u hingerdry merksch de gly
es hätt no schlimmer chönne sy
Doch wi jedi Sach muess o die e gueti Syte ha:
Solang me vo mir redt, bini wenigschtens no da!
Drum isch's nid schlimm
das geit verby
das wär's de gsi!
