E Vikar & e Fakir

 (Tegscht & Musig: Stefan Heimoz)

E Vikar und e Fakir
di hei mitenang es Glyr
jede fingt är syg im Rächt
u dr anger machis schlächt
U tatsächlech hei di zwe
nid vil gmeinsam, me chas gseh...

Dr Fakir tuet ds Muu wyt uf u schlückt es Schwärt
währenddäm dr Vikar dr Trubesaft läärt
dr Fakir louft über d Gluet wo no fasch brönnt
dr Vikar gieng über ds Wasser, wen är chönnt
dr Fakir lockt d Schlange, wen är Flöte spilt
dr Vikar het vo dr Schlange kes guets Bild

Dr Fakir ligt öppe mal uf ds Nagelbrätt
dr Vikar pfuuset lieber im Himmelbett
dr Fakir schwäbt o gärn überem Bode
dr Vikar prediget ir Kanzle obe
u verzellt, was dr Herrgott so alles cha
dr Fakir zeigt, was är sälber so verma

U kene dänkt sech, dass es chönnti nütze
we sech ihri Wäge meh würde chrütze
We si sich gseh, gits sofort Differänze
Ungerschide, Gägesätz, s git ja Gränze
u so stürme si, bis uf ds Mal e Sturm chunnt
wo tobet wi mes nie gseh het bis zur Stund

Wind u Wasser rysse ne d Gwänder dervo
zum Glück isch es nid no strüber usecho
irgendeinisch lat dä Sturm de langsam na
di zwe stöh, wär hätt das dänkt, füdleblutt da
U itz luege si dumm dry
d Ungerschide sy rächt chly

Zurück