Teenie im Huus

 (Tegscht & Musig: Stefan Heimoz)

We ds Wlan nümme geit, gits e Reklamation
u di chunnt natüerlech im "allerfründlechschte" Ton
für i dys Zimmer z ga, brucht me Stälze oder so
derfür schynts schampar schwirig z sy, mal usem Näscht z cho

U wes ändlech gschafft hesch, de blybt ds Bad stundelang bsetzt
sälbschtverständlech hesch es wider unger Wasser gsetzt
Google bruch i nümm, wüu du eh immer alles weisch
obwohl d mi, wenn i mit dir rede, nid ganz versteisch

Das ligt zwar meh dran, dass d Ohre grad uf Dürzug sy
vor no nid mängem Jahr bisch doch mal so härzig gsi
bim Ässe bruchsch e zwöiehalbfachi Portion
iPhone, iPad hei e rise Faszination

Losisch dr ganz Tag Heavy Metal, das isch ja klar
i has ja o so gmacht gha vor ungefähr 40 Jahr
mängisch würd i di gärn ufe Mond schiesse, ke Frag
nume würdsch mer total fähle, no am glyche Tag

Aber d Eltere chöme im Momänt eh nid drus
- mir hei es bsunders Exemplar vom ne Teenie im Huus!

Zurück